Mga opisyal ng SEC pinagbibitiw ni Enrile

MANILA – Nais ni Senate President Juan Ponce Enrile na sibakin ang lahat ng miyembro ng Securities and Exchange Commission (SEC) kaugnay sa pagkakadawit ng isang opisyal nito sa iskandalo ng nabangkaroteng Legacy Consolidated Plans Inc. Inihayag ito ni Enrile nitong Martes matapos atasan ang kanyang mga tauhan na gumawa ng isang resolusyon upang ipahayag ang damdamin ng Senado hinggil sa kabiguan ng SEC na protektahan ang interes ng mga plan holders sa pagbagsak ng Legacy na pag-aari ni Celso de los Angeles Jr. “Pinagawa ko na (ang resolusyon) at titingnan ko, tutal ipa-file ko ‘yan pero we will take that up when we open because there is no session baka April na," ayon kay Enrile. Nauna rito, inutos ng Palasyo na maghain ng leave of absence SEC Commissioner Jesus G. Martinez, matapos akusahan na nakinabang sa pondo ng Legacy. Sinabi ni Enrile na kailangang magbitiw ang mga miyembro komisyon dahil lahat sila ay may kasalanan sa nangyaring sigalot sa Legacy. “Alam mo, lahat sila sapagkat collegial body yun, one is not the commission. So, they must share the responsibility for the fiasco that has happened. Itong mga pre-need na ito na dapat nilang pangasiwaan sapagkat mayroong precedence ‘yan, bakit nangyari at ngayon lumilitaw na siguro hindi sila nagkikibuan sapagkat at least one of them ay mayroong connection sa Legacy," pahayag ng lider ng Senado. “Sabi nga ni Martinez, 'I am only one commissioner, I cannot influence the decision of the commission. Meaning tinatanggap niya na collective effort yung desisyon dun. Ngayon, kung yung ginagawa ng isang commissioner ‘di nila nalaman, bakit hindi nila nalaman? At kung nalaman man nila, bakit hindi umaksyon?" idinagdag ni Enrile. Ikinatuwa naman nito ang kautusan ng Malacanang na pagbakasyunin si Martinez habang isinasagawa ang hiwalay na imbestigasyon ang Presidential Anti-Graft Commission (PAGC) at Department of Justice (DOJ) hinggil sa kontrobersya. “That’s good, at least now the Palace has taken note of what is happening. Kami naman sa Senado, there's nothing personal about this, we're doing it as duly elected representatives of the people and as members of Congress who appropriate the money to pay the salaries of these people," aniya. “We have the power over the purse. Kami ang nagba-budget. Now, if they are not performing their job, it's our duty to see to it that these people will not stay in their jobs, they must be disciplined," ayon kay Enrile. Sinabi ni Enrile na maaaring kasuhan ng bribery at paglabag sa Anti-Graft and Corrupt Practices Act si Martinez at iba pang opisyal ng SEC na posibleng nakinabang sa pondo ng Legacy. - GMANews.TV