Filtered By: Topstories
News

De Castro, Villar, Escudero nanguna sa The Center survey


MANILA – Kung ngayon gaganapin ang 2010 presidential elections, magiging mahigpit ang laban nina Vice President Noli De Castro, dating Senate President Manny Villar at Senador Francis Escudero, ayon sa survey na ginawa ng The Center Pulso ng Pilipino. Batay sa survey na ginawa nitong Marso 2-6 na may margin of error na three percent para sa 1,200 respondents, nakakuha si De Castro ng 18 porsyento, habang 16 porsyento naman si Villar at 15 porsyento si Escudero. Nasa ikaapat na pwesto naman si dating Pangulong Joseph Estrada (13%), at nakabuntot si Sen. Loren Legarda (12%). Malayong nasa ika-anim na puwesto si Sen Mar Roxas (6%), at sumunod sina Metro Manila Development Authority Chairman Bayani Fernando (5%), Sens. Panfilo Lacson (4%), Richard Gordon (4%), Makati mayor Jejomar Binay (3%) at Defense Sec. Gilbert Teodoro (1%). Ayon kay Ed Malay, director ng The Center, posibleng nakakaapekto kina Lacson at Fernando ang mga negatibong istorya na naglalabasan tungkol sa kanila. Si Lacson ay nadadawit sa karumal-dumal na pagpatay kay Salvador Dacer at sa drayber nitong si Emmanuel Corbito. Samantalang usapin sa paglabag sa karapatang pantao sa mga sidewalk clearing operation ang ibinabato kay Fernando. “Negative news reviews stymie presidential drive of Sen. Ping Lacson and MMDA Chairman Bayani Fernando. It’s dead even in the race for the Vice Presidency," paliwanag ni Malay. “Senator Panfilo Lacson took a nosedive following the reopening of the Dacer-Corbito kidnap-murder case which saw the rating of the Senator from Cavite dropping by 3%," idinagdag sa survey. Lumitaw sa survey na kumpara sa huling survey noong nakaraang Disyembre, umangat ng apat na puntos si Escudero at tig-tatlong puntos naman sina De Castro at Estrada. Nalagasan naman ng tig-tatlong puntos sina Legarda at Lacson, at tig-isang puntos sina Villar at Fernando. Sa mga rehiyon, naging paborito sa National Capitol Region sina Escudero (18%), De Castro (16%) at Villar (14 %). Nanguna naman sa nalalabing bahagi ng Luzon si De Castro (17%), at sinundan nina Escudero at Estrada (tig-16%). Sa rehiyon ng Visayas, naging balwarte ito ni Villar (23%), at malayong pangalawa si de Castro (18%) at Escudero (14%). Paborito rin si De Castro sa Mindanao (20%), kasunod sina Estrada (19%) at Legarda (15%). - GMANews.TV
LOADING CONTENT