Gov Garcia mikiha sa organizers sa 'bikini' show sa Cebu

CEBU CITY, Philippines - Gikiha ni Governor Gwendolyn Garcia ang tag-iya sa resort of mga organizer sa giingong bastos nga pasundayag didto sa usa ka beach resort sa lungsod Sta. Fe sa Bantayan Island niadtong Sabado Santo sa gabii. Lakip usab sa gikasuhan ang tanang mga tawo nga nalambigit sa maong show. Gipakita sa gobernador sa programa sa Balitang Bisdak ang video nga nakuha. Giklaro sa gobernador nga ang iyang executive order dili pa sa ponto sa pag-bikini, ug gidugang pa nga giayo man unta niya’g istorya si Elton Tio, organizer sa Pump Smmer nga pasundayag, ug ang tag-iya sa resort nga si Romel Solomon. Nunot niini, kasong kriminal ang gipasaka Martes sa hapon ni Garcia pinaagi sa abogado sa kapitolyo nga si Atty. Marino Martinquilla batok nila Tio, Solomon, ug uban pa. Matud sa gobernador, gilapas sa mga respondent ang Women Development Code ug Revised Penal Code kalabut sa indecent shows. Ipatawag sa gobernador si Supt. Erson Digal, hepe sa Task Force Igmat nga nadestino sa isla sa Bantayan ug police provincial Director Carmelo Valmoria. - Balitang Bisdak