PEP still mum on Richard Gutierrez's lawsuit

Hindi pa ring nagbibigay ng komento ang kampo ng entertainment Web site na Philippine Entertainment Portal (PEP) kaugnay sa libel case na isinampa sa kanila ni Richard Gutierrez. Sa Chika Minute portion ng "24 Oras" nitong Miyerkules, sinabing hindi pa umano natatanggap ng abogado ni PEP editor-in-chief Jo-Ann Maglipon ang kopya ng reklamo ni Richard kaugnay sa umano’y gulong nangyari sa kanila ng aktor na si Michael Flores. Kinasuhan ni Richard ang PEP dahil hindi umano totoo ang lumabas na istorya sa Web site na nag-away sila ni Michael sa isang birthday party. Sa reklamong isinampa ni Gutierrez sa Makati Prosecutors Office kamakailan, humihingi ang aktor ng P25 milyong damages sa PEP -- P15 milyong moral damages at P10 milyong exemplary damages. Ayon sa abogado ng PEP na si Atty Sandra Olaso-Coronel, tinatapos umano ni Maglipon ang kompletong istorya sa naturang insidente nina Richard at Michael. “If you remember ang pangako ni Joan na pinul-out yung storya from PEP because kulang ang investigation. So ngayon more or less tapos na ang investigation nila, more or less the story is being written, ready and any moment will be able to come out with the final story," ayon kay Olaso-Coronel. Bukod kay Maglipon, kabilang sa mga respondents sa reklamong inihain ni Gutierrez ay sina PEP managing editor Karen Pagsolingan at staff writer Ferdinand Godinez. "We just want to get to the bottom of this and we want to find out the truth kung sino'ng tao ang nasa likod nito," ayon kay Gutierrez na bida sa Kapuso primetime series na “Zorro." - Fidel Jimenez, GMANews.TV