Presyo ng produktong petrolyo itinaas

MANILA – Matapos ibasura ang Executive Order 845 na nagpatupad ng price control sa mga produktong petrolyo, nagsimula ng magtaas ang halaga ng naturang produkto pagsapit nitong Miyerkules.

Ganap na 12:01 am nitong Miyerkules, ipatutupad ng Petron Corporation, Pilipinas Shell, Eastern Petroleum at Flying V, ang bagong halaga ng kanilang mga produkto.

Magtataas ng P1.50 per liter sa gasolina at kerosene ang Shell at Petron, habang P2 per liter naman sa diesel at P2 per kilogram sa liquefied petroleum gas (LPG).

Halos hindi rin naiiba sa Shell at Petron ang price increase na ipatutupad ng Eastern Petroleum at Flying V.

Sinabi ni Bobby Kanapi, vice president for communication ng Shell, na ang price increase ay dulot ng pagtanggal sa Executive Order 845 na naging epektibo nitong Lunes.


For the latest Philippine news stories and videos, visit GMANews.TV

Ipinatupad ni Pangulong Gloria Macapagal Arroyo ang EO 845 sa Luzon noong nakaraang buwan dahil na rin sa kalamidad na idinulot ng mga bagyong "Ondoy" at "Pepeng."

Una rito, nanawagan sa Malacanang ang mga kumpanya ng langis na alisin ang EO 845 dahil umano sa pagkalugi. Nagbabala pa sila na posibleng magkaroon ng kakulangan ng suplay sa produktong petrolyo kung hindi siya papayagang mabawi ang kanilang lugi.

Kasabay ng pag-alis sa EO 845, nangako ang mga kumpanya ng langis na gagawing patingi-tingi ang price increase hanggang sa mabawi umano nila ang tinatayang P5 bawat litro ng pagkalugi mula ng ipatupad ang kautusan ni Arroyo. - GMANews.TV