Ex-actor na inalis sa pagka-kongresista tiwalang makababalik
11/20/2009 | 06:56 PM
MANILA – Kumpiyansa ang dating aktor na si Dan Fernandez na makababalik siya sa kanyang puwesto bilang kinatawan ng unang distrito ng Laguna.
Sinabi ni Fernandez nitong Biyernes na hindi na siya nagpupunta sa Kamara de Representantes mula nang ihayag ni House Secretary General Marilyn Yap noong Oktubre na ipatutupad na nila ang desisyon ng House of Representatives Electoral Tribunal (HRET)
Nagdesisyon ang HRET na idiskuwalipika ang dating aktor dahil napatunayan umano na kulang ang panahon na inilagi nito sa distrito kung saan siya tumakbo at nanalo noong 2007 elections.
“Matagal na ‘kong hindi nagpupunta (sa Kamara) mula nang masulat na aalisin na raw ako (sa listahan ng mga kongresista). Wala na rin namang ginagawa dun, ilang buwan na lang eleksiyon na," pahayag ni Fernandez, asawa ng aktres na si Sheila Ysrael.
Disyembre 2008 nang magdesisyon ang HRET na panigan ang petisyon na inihain ng isang sibilyan na nagsasabing hindi naabot ni Fernandez ang residency requirement sa distrito kung saan ito kumandidato.
Abril ngayon taon nang ibasura naman ng HRET ang motion for reconsideration ni Fernandez. Iniakyat niya sa Korte Suprema ang kanyang kaso ngunit hanggang ngayon ay wala pa ring desisyon ang mga mahistrado kaya ipinatupad ng liderato ni Speaker Prospero Nograles ang kautusan ng tribunal.
Dahil ilang buwan ding naantala ang pagpapatupad ng desisyon ng HRET, kinasuhan si Nograles sa House Ethics Committee ni Atty. Sixto Brillanes.
Tatakbo uli
Ayon kay Fernandez, muli siyang tatakbong kongresista sa unang distrito ng Laguna sa May 2010 elections sa ilalim ng partidong Lakas-Kampi.
Sinabi ng mambabatas na wala siyang hinanakit sa administrasyon at liderato sa Kamara kahit ipinatupad ang kautusan ng HRET.
“Tatakbo uli ako sa Lakas (party). Landslide ang panalo ko noon (2007 elections) at sa tingin ko mas malaki ang boto ko sa susunod kasi nakita ng mga tao ang ginawa sa’ken," pahayag nito.
Tiwala rin si Fernandez na papaboran din siya ng Korte Suprema kapag nagpalabas ng desisyon ang mga mahistrado tungkol sa naging hatol ng HRET.
“Baka sa susunod na linggo magpalabas ng desisyon, hopefully. Ako tiwala, ako na papabor sa’ken (ang desisyon ng SC)," idinagdag niya.
Ngunit kung hindi man maging pabor sa kanya ang desisyon ng SC, sinabi ni Fernandez na pabor pa rin ito sa kanyang panig dahil mangangahulugan na maaari uli siyang tumakbo sa susunod na tatlong halalan.
"Ibig sabihin hindi counted ang pag-upo ko ngayon kaya puwede pa ko ng three terms, pabor pa rin sa akin 'yon," paliwanag niya.
Sa resulta ng 2007 elections, umabot sa 35,000 boto ang lamang ni Fernandez sa pinakamalapit na kalaban niya na si Neric Joaquin, anak ng dating kongresista na si Uliran Joaquin.
Sinabi ni Fernandez na inaasahan niya na si Uliran ang makakalaban niya sa May 2010 elections ngunit posible umanong magkaproblema rin ito dahil kinukuwestiyon naman ang kanyang nationality. - GMANews.TV
Sinabi ni Fernandez nitong Biyernes na hindi na siya nagpupunta sa Kamara de Representantes mula nang ihayag ni House Secretary General Marilyn Yap noong Oktubre na ipatutupad na nila ang desisyon ng House of Representatives Electoral Tribunal (HRET)
Nagdesisyon ang HRET na idiskuwalipika ang dating aktor dahil napatunayan umano na kulang ang panahon na inilagi nito sa distrito kung saan siya tumakbo at nanalo noong 2007 elections.
“Matagal na ‘kong hindi nagpupunta (sa Kamara) mula nang masulat na aalisin na raw ako (sa listahan ng mga kongresista). Wala na rin namang ginagawa dun, ilang buwan na lang eleksiyon na," pahayag ni Fernandez, asawa ng aktres na si Sheila Ysrael.
Disyembre 2008 nang magdesisyon ang HRET na panigan ang petisyon na inihain ng isang sibilyan na nagsasabing hindi naabot ni Fernandez ang residency requirement sa distrito kung saan ito kumandidato.
Abril ngayon taon nang ibasura naman ng HRET ang motion for reconsideration ni Fernandez. Iniakyat niya sa Korte Suprema ang kanyang kaso ngunit hanggang ngayon ay wala pa ring desisyon ang mga mahistrado kaya ipinatupad ng liderato ni Speaker Prospero Nograles ang kautusan ng tribunal.
Dahil ilang buwan ding naantala ang pagpapatupad ng desisyon ng HRET, kinasuhan si Nograles sa House Ethics Committee ni Atty. Sixto Brillanes.
Tatakbo uli
Ayon kay Fernandez, muli siyang tatakbong kongresista sa unang distrito ng Laguna sa May 2010 elections sa ilalim ng partidong Lakas-Kampi.
Sinabi ng mambabatas na wala siyang hinanakit sa administrasyon at liderato sa Kamara kahit ipinatupad ang kautusan ng HRET.
“Tatakbo uli ako sa Lakas (party). Landslide ang panalo ko noon (2007 elections) at sa tingin ko mas malaki ang boto ko sa susunod kasi nakita ng mga tao ang ginawa sa’ken," pahayag nito.
Tiwala rin si Fernandez na papaboran din siya ng Korte Suprema kapag nagpalabas ng desisyon ang mga mahistrado tungkol sa naging hatol ng HRET.
“Baka sa susunod na linggo magpalabas ng desisyon, hopefully. Ako tiwala, ako na papabor sa’ken (ang desisyon ng SC)," idinagdag niya.
Ngunit kung hindi man maging pabor sa kanya ang desisyon ng SC, sinabi ni Fernandez na pabor pa rin ito sa kanyang panig dahil mangangahulugan na maaari uli siyang tumakbo sa susunod na tatlong halalan.
"Ibig sabihin hindi counted ang pag-upo ko ngayon kaya puwede pa ko ng three terms, pabor pa rin sa akin 'yon," paliwanag niya.
Sa resulta ng 2007 elections, umabot sa 35,000 boto ang lamang ni Fernandez sa pinakamalapit na kalaban niya na si Neric Joaquin, anak ng dating kongresista na si Uliran Joaquin.
Sinabi ni Fernandez na inaasahan niya na si Uliran ang makakalaban niya sa May 2010 elections ngunit posible umanong magkaproblema rin ito dahil kinukuwestiyon naman ang kanyang nationality. - GMANews.TV
