Central Visayas dunay 26,000 child laborers

Mokabat sa 26,000 ka mga bata sa Region 7 napugos sa pagtrabaho tungod sa kakabus. Katunga niini naggikan mismo sa Sugbo, matod sa mga opisyales sa rehiyon. Atol sa pagtuki sa problema sa child labor sa mga kawani sa regional school board, nga gitambungan usab sa mga opisyal sa nagkadaiyang ahensya sa gobyerno ug mga non-government organizations, nitumaw nga nahikawan ang mga bata sa ilang mga katungod. Labing nahikaw niining mga bata ang ilang katungod nga makapahimos sa ilang pagkabata ug ang ilang katungod sa edukasyon. Tumang kakabus ang gitumbok nga hinungdan sa problema sa child labor sa rehiyon. Dunay unom ka iingong grabeng matang sa child labor dinhi sa Central Visayas nga gilangkuban sa pagpangisda, pagmina, pagtrabaho sa katubhan, pagpaulipon, prostitusyon ug pagtrabaho sud sa pyrotechnics industry. Nabantong ang dakbayan sa Lapu-Lapu sa paggama og mga pabuto ug sulod sa mga pabrika sa pabuto gikatahong daghang mga batang gi-hire isip mga trabahante. Nasuta nga dunay 1,500 ka mga bata ang nagtrabaho sa pyrotechnics firms sa naasoyng dakbayan. Giaksyonan na, matod pa, ang problema sa lokal nga pangagamhanan. Gikatahong nagtambayayong ang Department of Labor ug Department of Education lakip ang ubang mga ahensya sa gobyerno sa pag-agni sa mga ginikanan pag-agak sa ilang mga anak aron ganahang motungha. - Balitang Bisdak