Bata nga napaakan sa K-9 Unit dog gihilantan

Kwatro anyos nga bata’ng babaye nga gihambat sa canine dog sulod sa Capitol compound gihilantan ug dili makabarug. Samtang ang iro gi-obserbahan pa sulod sa 14 ka adlaw aron masuta kon duna ba kini’y rabies. Naabtan pa sa Balitang Bisdak team ang bata nga si Ira Marie Labitad nga naghigda sa ilang baligyaanan ug mga prutas. Sumala sa iyang inahan nga wala silay kabinlan sa bata sa ilang pinuy-anan busa iya kining gipa-uban. Apan nasuta nga dunay hilanat si Ira ug maglisod usab sa pagbangon tungod sa kasakit sa iyang mga samad pinaakan sa iro. Nabalaka ang inahan nga gumikan sa ka-yagpis sa lawas sa iyang anak hayan nakalapos ang mga ngipon sa iro sa bukog sa bata. Gipadayag ni Dr. Catherine Buscato, sa animal bite section sa Integrated Provincial Health Office, nga na-injectionan na ug bakuna sa anti rabies ug anti tetanus ang bata. Hinoon tan-awon pa nila ang tanang posibilidad nga maghatag ug peligro sa kinabuhi sa bata. Samtang gipahibawo ni Buscato nga gipaubos na sa quarantine ang iro sa K-9 unit nga nakapaak sa biktima. — Balitang Bisdak