Para mas ligtas: Nurse na biktima ng rape sa Maguindanao ipinalilipat sa Maynila

MANILA – Nais ni Justice Secretary Leila de Lima na mailipat sa Maynila ang volunteer nurse na hinihinalang biktima ng gang rape sa Maguindanao upang higit mabigyan ng seguridad. Kasabay nito, nagbabala si De Lima na ituturing suspek si South Upi Vice-Mayor Jordan Ibrahim kung hindi umano ito makikipagtulungan sa mga awtoridad sa isinagawang imbestigasyon sa kaso ng nurse na itinago sa pangalang “Florence." "We're mulling over the idea that if her physical condition so warrants, she may be transferred here (sa Manila mula sa Davao City). We will make sure she is adequately secured," ayon sa kalihim. Inatasan din ni De Lima ang mga ahente ng National Bureau of Investigation (NBI) na kunin ang pahintulot ni Ibrahim upang makuha ang blood at oral swab samples nito para sa pagsusuri. Kung hindi umano papayag ang lokal na opisyal, may posibilidad na ikonsiderang suspek ang bise alkalde. "I want the NBI to give me an update if the vice mayor is still willing to submit the samples. If not, then we'll probably consider him a suspect," pahayag ng Justice secretary. Nitong Lunes, inihayag ni De Lima na posibleng hindi biktima ng gang rape si Florence at isa tao lamang humalay sa kanya batay sa nakuhang “DNA profile" ng NBI sa biktima. Gayunman, hindi nagtugma ang DNA profile na nakuha kay Florence nang ihambing sa DNA sample ng unang anim na taong dinakip kaugnay sa krimen na naganap noong Setyembre 25 sa South Upi. "The DNA profile points to a single perpetrator. It's not any of the six, and it's not (Melchor) Fulgencio. It's most probably not gang-rape, that is what the NBI is looking into now. It may not be a conclusion yet, but so far the evidence points to that — that it's most probably not a gang rape," ayon kay De Lima. Si Fulgencio ang itinuturing testigo sa kaso na unang nagdawit sa anim na suspek. Ngunit kalaunan ay binawi nito ang kanyang mga pahayag. Nitong Martes, sinabi ni De Lima na may mga testigo na nagdadawit kay Ibrahim sa panghahalay kay Florence ngunit natatakot ang mga ito na lumantad sa pangambang gantihan sila. Iniutos na ni De Lima na alamin kung ang tinukoy na “Edwin" ni Fulgencio na sangkot sa krimen at si Ibrahim ay iisa. "Fulgecio was saying he also attempted to penetrate or rape the victim but he was unsuccessful because he was too drunk. The one who successfully penetrated and raped the victim, he is the one we're looking for now. There are information that it's possibly the vice-mayor. It's just that people in South Upi are too afraid of him," paliwanag ni De Lima. - GMANews.TV