Panukalang batas na itaas ang combat pay ng sundalo, inaprubahan

MANILA – Inaprubahan ng Senado ang panukalang batas na itaas ang combat pay ng mga sundalo na nahaharap sa panganib sa pagtupad ng kanilang tungkulin. Sinabi ni Senador Francis Escudero na ang pagtaas sa combat pay ng mga sundalo ay nakapaloob sa Committee Report No. 8. Mula sa kasalukuyang limang porsiyentong combat pay, itinaas ito ng Senado sa 25 porsiyento. Sakop ng dagdag na benepisyo ang lahat ng opisyal at enlisted personnel ng Armed Forces of the Philippines na nasasabak sa digmaan. Ang karaniwang sundalo na natatalaga sa combat zone ay nakatatanggap ng tinatayang P240 bawat buwan. Samantala, aabot naman sa P12,150 bawat buwan ang sahod ng isang private sa AFP. “In the proposed measure, soldiers assigned to tactical brigades and its combat compliments will receive an increase based on the category of danger they are in. Those assigned to the most hazardous areas shall receive 25 percent of a private’s base pay, 15 percent for the more hazardous areas and 15 percent for the hazardous areas," paliwanag ni Escudero. “It has been 22 years since the AFP increased its combat pay for our soldiers. This is most timely given the increasingly hazardous duties our soldiers are facing in the service of our country coupled with inflation rates and higher cost of commodities and services. This will surely augment the salaries of those in the field whose one foot is already in the grave," idinagdag niya. Sa ngayon ay umaabot sa 88, 075 sundalo ang tumatanggap ng combat duty pay na may kabuuang halaga na P253 milyon. Kapag tuluyang naipasa sa Kongreso ang panukala, itataas ang alokasyon sa P2.5 bilyon para sa pagtaas sa combat pay ng mga sundalo. – GMANews.TV