Pinas magpapadala ng grupong tutulong sa mga nasalanta ng lindol, tsunami sa Japan

MANILA – Bumubuo ng isang grupo ang Pilipinas na ipadadala sa Japan para tumulong sa search, rescue at relief operations sa mga biktima ng lindol at tsunami sa Japan. Sinabi ni Deputy presidential spokeswoman Abigail Valte na kaagad tutulak sa Japan ang grupo na magmumula sa National Disaster Risk Reduction and Management Council (NDRRMC), kapag nakakuha na ng pahintulot. “From what I understand from Undersecretary (Benito) Ramos of NDRRMC, nag-form sila ng search and rescue team ... pantulong. Narinig ko kanina na ang Philippine Red Cross magpapadala ng contingent. (Pero) ang government team di pa malinaw kailan aalis," pahayag ni Valte sa government-run radio station dzRB. “Once Japan is ready to receive our assistance we will be ready to send our people there," idinagdag niya. Nitong Biyernes ay nagpaabot ng mensahe ng pakikiramay at pakikiisa si Pangulong Benigno “Noynoy" Aquino III kay Japanese Prime Minister Naoto Kan kaugnay ng sinapit na delubyo ng Japan dulot ng lindol at sinundan ng tsunami. Tiniyak ni Aquino kay Kan na aayuda ang Pilipinas sa kinakaharap na pagsubok ng Japan. “As a close friend and neighbor, Japan has constantly stood by the Philippines, as we dealt with past tribulations wrought by nature. Our extensive and long-standing ties of friendship means that Japan is also home to a vast number of Filipinos, whose welfare also represents a paramount concern. During this difficult time, I assure Your Excellency that the Philippine Government stands ready, to extend any support and assistance within its capability, as Japan strives to cope with the aftermath of this tragic event," pahayag ni Aquino sa sulat na ipinadala sa Punong Ministro ng Japan. Sa talaan ng Department of Foreign Affairs, may 305,972 Pinoy ang nagtatrabaho at naninirahan sa Japan. Iniulat din ng dzRB na magpapadala ang Philippine Red Cross (PRC) ng grupo sa Japan upang tumulong sa rescue at relief operations. Kasama sa grupo ang eksperto sa psycho-social problems; at dalawang dog handler kasama ang dalawang K-9 na tutulong sa paghahanap sa mga biktima. Magdadala rin ang PRC team ng mga communication equipment at water treatment. —GMA News