Krista Ranillo gives birth to a baby boy

Isang malusog na sanggol na lalaki ang iniluwal ng dating sexy actress na si Krista Ranillo sa US. Sino kaya ang mas kamukha ng baby? Isinilang umano ni Krista ang first baby nila ni Nino Lim sa isang ospital sa Southern California nitong Martes, ayon kay entertainment reporter Lhar Santiago. Sa ulat ng Chika Minute ng 24 Oras nitong Biyerners, sinabi na ang mahigit 8 pound baby ay pinangalanan nina Krista at Nino, na si Nathan Jacob. Kahit may kalakihan ang bata, sa natural na paraan naman ito iniluwal ni Krista. Umabot umano ng limang oras ang pagla-labor ng aktres. Noong una ay ayaw raw ni Krista na gumamit ng pangpamanhid, pero hindi umano nito kinaya ang sakit. Sa kabila ng pagbubuntis, nanatili namang balingkinitan ang katawan ni Krista, at nagpapa-breastfeed din ito sa kanyang unang baby.
For the latest Philippine news stories and videos, visit GMANews.TV Masaya si Nino sa pagsilang ni Nathan Jacob lalo pa’t marami raw ang nagsasabi na siya ang kamukha ng bata. Nakuha ng bata ang hugis ng mukha, mata at labi ng kanyang ama. Hindi pa alam kung kailan lalabas ng ospital ang mag-ina, at hindi pa napaplano ng mag-asawa kung kailan pabibinyagan si Nathan Jacob. Sina Krista at Nino ay ikinasal sa US noong Agosto 2010. - FRJimenez, GMA News