Yaman ng mga senador: Villar pinakamayaman, Trillanes ‘pinakamahirap’

MANILA – Kahit nabawasan ang idineklarang halaga ng mga ari-arian, nanatiling pinakamayamang senador sa bansa si Sen Manny Villar, at nanatiling “pinakamahirap" naman si Sen Antonio Trillanes IV. Batay sa isinumiteng Statement of Assets and Liabilities and Net Worth (SALN) ng mga senador para sa taong 2010, nakapagtala si Villar ng P725.2 milyong ari-arian. Mas mababa ito ng mahigit P200 milyon, kumpara sa idineklarang ari-arian ng senador noong 2009 na umabot sa P947.88 milyon. Si Villar ay tumakbong presidente pero natalo kay Pangulong Benigno “Noynoy’ Aquino III, noong May 2010 elections. Samantala, kahit lumago naman ang ari-arian ni Trillanes sa mahigit P300,000 ngayong 2010, nanatili naman siyang “pinakamahirap" na senador sa idineklarang kayamanan na umaabot sa P3.8 milyon. Kabilang sa mga senador na mahigit sa P100 milyon ang idineklarang ari-arian ay sina Sens Ralph Recto (P418.5M); Ferdinand Marcos Jr. (P311.5M); Ramon Bong Revilla Jr. (P125.7M) at Senate President Juan Ponce Enrile (P116M). Hindi naman umabot sa P15 milyon ang idineklarang ari-arian nina Sens Francis Pangilinan (P12.4M); Joker Arroyo (P11M); at Francis Escudero (P8M). Batay sa website ng Senado, ang bawat senador ay tumatanggap ng P35,000 buwanang sahod, samantalang mas mataas ang natatanggap ng Senate President na P40,000. Narito ang listahan ng ari-arian ng mga senador: (1) Manuel Villar - P725.2 million (2) Ralph Recto - P418.5 million (3) Ferdinand Marcos Jr. - P311.5 million (4) Ramon Bong Revilla Jr. - P125.7 million (5) Juan Ponce Enrile - P116 million (6) Jinggoy Estrada - P93.5 million (7) Sergio Osmeña III - P82.3 million (8) Pia Cayetano - P76.7 million (9) Teofisto Guingona III - P73.9 million (10) Edgardo Angara - P70 million (11) Vicente Sotto III - P48.9 million (12) Loren Legarda - P45.5 million (13) Juan Miguel Zubiri - P41.2 million (14) Miriam Defensor-Santiago - P40.3 million (15) Franklin Drilon - P33.4 million (16) Panfilo Lacson - P24.7 million (17) Gregorio Honasan - P19.3 million (18) Lito Lapid - P18.9 million (19) Alan Peter Cayetano - P15.9 million (20) Francis Pangilinan - P12.4 million (21) Joker Arroyo - P11 million (22) Francis Escudero - P8 million (23) Antonio Trillanes IV - P3.8 million - GMA News