Reporma sa POEA iniutos ng Labor secretary

MANILA – Iniutos ni Department of Labor and Employment Secretary Rosalinda Dimapilis-Baldoz, na ipatupad ang mga reporma sa Philippine Overseas Employment Administration (POEA) para sa kapakanan ng mga overseas Filipino worker (OFWs). Pag-amin ng kalihim, nagkakaroon ng epekto sa institusyon ang mga ulat at alegasyon tungkol sa kapabayaan ng ilang opisyal at kawani ng POEA sa pagtugon sa pangangailangan ng mga migranteng manggagawa. “The only way for the POEA to remain relevant and responsive to its clients– our overseas Filipino workers— is for us to implement urgently-needed reforms without any further delay," pahayag niya nitong Huwebes. Tiniyak din ni Baldoz na aaksyunan ang mga reklamo ng katiwalian laban sa mga opisyal at kawani ng POEA, alinsunod na rin kampanya ng pamahalaan kontra sa korupsiyon. Kabilang sa mga reporma na nais ipatupad ng kalihim sa POEA ay pabilisin ang pagproseso sa mga dokumento ng mga OFW. Nais din ni Baldoz na magpatupad ng computer-based Pre-Departure Orientation Seminars (PDOS), at limitahan ang partisipasyon ng mga pribadong sektor (tulad ng mga bangko) tungkol sa usapin ng PDOS. Susuriin ding mabuti ang mga kaso at reklamo sa mga recruitment agency bago pagkalooban muli ng lisensiya para mag-operate. Umaasa ang opisyal na higit na mapapahusay ang pagsisilbi ng POEA sa mga OFW kapag naipatupad ang mga reporma sa ahensiya. -- GMA News