'Long weekend' sa huling linggo ng Agosto

MANILA – Planuhin na ang lakad sa huling linggo ng Agosto dahil maaari itong maging “long weekend" kapag idineklara ng pamahalaan na holiday ang Agosto 30, ang pagtatapos ng holy month ng Ramadan sa relihiyong Islam. Sa panayam ng dzRB radio nitong Sabado, nilinaw ni deputy presidential spokesperson Abigail Valte na hindi idedeklarang holiday ang Agosto 1 na simula ng Ramadan. “Nakausap ko ang chief of staff ni Executive Secretary Paquito Ochoa Jr. Ang sabi nila, August 1 hindi holiday. Ang magiging holiday, August 30 (Martes), ang end of Ramadan," paliwanag ni Valte. Ang Eid’l-Fitr ay idinedeklarang holiday na pagwawakas ng Ramadan, ang buwan ng pag-aayuno ng mga Muslim. Ayon kay Valte, holiday din ang Agosto 29 (Lunes), bilang National Heroes’ Day. Ngunit hindi naman idedeklarang holiday ang Agosto 27 (Sabado). Sa ilalim ng Proclamation No. 84, ang National Heroes’ Day ay idedeklara sa huling Lunes ng Agosto. Samantala, ang holiday para sa Eid’l Fitr at Eidul Adha ay maaaring ilipat ng petsa. Nakasaad sa Section 2 ng proklamasyon na, “The proclamations declaring national holidays for the observance of Eid’l Fitr and Eidul Adha shall hereafter be issued after the approximate dates of the Islamic holidays have been determined in accordance with the Islamic calendar (Hijra) or the lunar calendar, or upon Islamic astronomical calculations, whichever is possible or convenient. To this end, the National Commission on Muslim Filipinos (NCMF) shall inform the Office of the President on which day the holiday shall fall."— GMA News