Filipino sign language

Sa pamamagitan ng kumpas ng mga daliri at galaw ng mga kamay o sign language na mayroon na ring Filipino version, nagagawang maipahayag ng mga hindi nakapagsasalita at nakakarinig ang kanilang mga damdamin. Sa ulat ni GMA News reporter Rawna Crisostomo sa GMA News TV SONA ni Jessica Soho, sinabi nito na ang bawat kumpas at galaw ng kamay, ang bawat buka ng bibig at ngiti ng labi, ay may katumbas na kahulugan sa mga pipi’t bingi. Katulad umano ng ibang lengguwahe, ang sign language ay makulay, maingay, at puno ng buhay. Hindi ito dapat maliitin dahil bukod sa kumplikado, kaunting pag-iiba ng galaw at pagpakiling ng mga daliri ay maaari na umanong magpabago ng kahulugan.
For the latest Philippine news stories and videos, visit GMANews.TV Ang mga salita na walang kahulugan sa senyas ng kamay ay maaari namang baybayan gamit ang mga daliri. Ang bawat titik daw ng mga albato ay may katumbas na porma ng daliri. Sinasabing unang ipinakilala sa Pilipinas ang American Sign Language o ASL noong 1989 nang sakupin ng mga Amerikano ang bansa. Samantala, 20th century naman nang magkaroon ng Pinoy version ang lengguwahe ng mga pipi’t bingi na tinatawaf na FSL o Filipino Sign Language. At tulad ng wikang Filipino na buhay at patuloy na yumayabong, ganoon din umano ang FSL na patuloy na ipinagbubuti para mas madaling maunawaan. Sumasabay din ang teknolohiya at mga modernong kagamitan sa pagtataguyod ng komunikasyon para sa mga hindi nakapagsasalita at nakakarinig. – GMA News