Twitter sa Tagalog, dapat gamitin sa pagpapalaganap ng wikang Pinoy

MANILA – Ikinatuwa ng National Artist for Literature na si Dr Virgilio Almario ang pagkakaroon ng Tagalog version ng Twitter dahil magagamit itong paraan sa pagpapalaganap ng wikang Filipino. Sa panayam sa telepono ng GMA News Online nitong Huwebes, sinabi ni Almario na welcome development ang pagbibigay pansin ng modernong teknolohiya sa wikang pambansa. Aminado naman si Almario, mas kilala sa larangan ng literatura bilang makatang si “Rio Alma," na hindi siya gumagamit ng Twitter pero mayroon siyang Facebook account. “Okey ‘yan (Twitter in Tagalog), basta hindi makasasama sa tao, ‘wag lang maging social addiction," pahayag ni Almario. “Sana magamit ‘yan sa tamang paraan ng paggamit ng wika, mapaunlad at mapalaganap pa ang wikang Filipino." Si Almario ay dating dean sa UP Diliman’s College of Arts and Letters at siyang nanguna sa paglikha ng UP Diksiyonaryong Filipino. (Basahin: National Artist na mas kilala sa binaliktad niyang apelyido) Nitong Huwebes, nakasaad sa blog ng Twitter na bukod sa Tagalog version, mayroon din na ring version ng Chinese, Hindi, Malay version ng Twitter. "With these new languages Twitter will now be more easily accessible to almost half a billion people around the world," ayon sa blog.
For the latest Philippine news stories and videos, visit GMANews.TV Umaabot na umano sa 17 lenguwahe ang bersiyon ng Twitter ngayon. "Our crowd-sourced translation process relies on a dedicated community of volunteer translators to both translate and moderate twitter.com, support pages, Twitter apps and more. Many thanks to our 290,000 (and counting) volunteer translators," dagdag sa blog. Wala naman nakikitang pangangailangan si Almario na hanapan sa salitang Filipino ang ‘Twitter’ bagaman may ilang nagsasabi na ang Tagalog version nito ay “Tiririt." “Bakit pa? Okey na ‘yon (Twitter). Hindi naman natin pinalitan ang pangalan ng Facebook," anang pambansang alagad ng sining. - FRJ, GMA News