Wikang Filipino, nais gamitin sa debate ng RH bill

MANILA – Upang lalong maunawaan ang publiko, hiniling ng isang Obispo ng Simbahang Katoliko na wikang Filipino ang gamitin ng mga mambabatas sa pagtalakay ng kontrobersiyal na Reproductive Health (RH) bill. Ang hiling ay ginawa ni Tagbilaran Bishop Leonardo Medroso, bunga na rin ng pag-aalinlangan si Sen Lito Lapid na makipagdebate tungkol sa RH bill dahil wikang Ingles gnagamit ng kanyang mga kasamahan ang debate lalo na si Sen Miriam Defensor Santiago. Sa panayam ng Veritas radio nitong Miyerkules, ipinahayag ni Medroso ang paghanga kay Lapid sa pagpupursige ni Lapid na makipagdebate kay Santiago tungkol sa RH bill. Ngunit nanghihinayan ang Obispo dahil hindi umano maipahayag ni Lapid ang kanyang mga argumento kung sa paraan ng wikang Ingles ang magiging talakayan. Dapat umanong pagbigyan ng liderato ng Senado ang kahilingan ni Lapid na sa wikang Filipino niya idadaan ang paghahayag ng kanyang posisyon laban sa kontrobersiyal na panukalang batas. “Sayang lang kasi wala siyang ( Lapid) skill in communicating English at talagang Tagalog lang o Filipino lang talaga ang mas gamay niyang gamitin. Sayang, kasi marami talaga siya sa tingin ko masasabi na katotohanan laban sa RH bill," pahayag ni Mendroso, chairman ng Episcopal Commission on Cannon Law ng Catholic Bishops Conference of the Philippines. Ipinaliwanag din ng Obispo na hindi lang si Lapid, kundi ang higit na nakararaming Pilipino ang makauunawa sa usapin ng RH bill kung sa wikang Filipino gagawin ang pagtalakay sa panukalang batas. “Sana our senators also like Miriam (Santiago) and Pia (Cayetano) would open themselves also to use Filipino language sa RH debate," mungkahi ng obispo. Cayetano okey sa wikang Filipino Sa hiwalay na panayam ng media nitong Miyerkules, sinabi ni Sen Pia Cayetano na handa siyang makipagdebate kay Lapid sa wikang Filipino upang maipaunawa niya ang kahalagahan ng RH bill. “Of course, ‘di ba paminsan-minsan naman, pag ine-emphasize ko, para bigyang-diin ko yung mga paliwanag ko, tina-Tagalog ko nga eh. Walang problema yun. Tanggap naman po natin yung Filipino tsaka yung English bilang ating modes of communication di ba? So walang problema yun," anang senadora. Idinagdag ni Cayetano na kadalasang wikang Filipino rin ang ginagamit niya sa pagpapaliwanag sa mga kababaihan tungkol sa RH bill lalo na sa mga nakatira sa rural at depressed areas. “Atually, kumportable po tayo diyan (sa Filipino). Ang hindi ko lang mata-Tagalog ay yung mga medical terms. Pero kahit naman yun hindi ko rin naman lahat naiintindihan, binabasa ko lang naman yung medical definition, kaya ko namang i-translate yun," paliwanag niya. Ipinaabot din ng senador ang paghanga kay Lapid dahil sa pagiging tapat nito upang maipahayag ang kanyang saloobin sa isang mahalagang talakayan. “Natutuwa nga kami na nagsasabi siya na meron siyang mga gustong maipaliwanag. I'm very happy to hear that, ibig sabihin, may open mind," ayon kay Cayetano. - GMA News