MTV dokyu kontra human trafficking ipapalabas sa GMA News TV Channel 11

Itatanghal sa GMA News TV Channel 11 ang isang 30-minutong dokumentaryo ukol sa salot ng sexual exploitation at human trafficking, ayon sa MTV End Exploitation and Trafficking Campaign (MTV EXIT). Host si Kapuso star Dingdong Dantes ng dokyu na ipapalabas sa Nobyembre 27 sa ganap na 9:55 nang gabi. Inilunsad ang MTV EXIT sa harap ng mahigit 25,000 katao na nakiisa kina Dingdong Dantes, Korean star Jay Park at Grammy winner Jason Mraz sa concert kamakailan sa Pasay City. Naroon din ang California-based alternative rock band na Evaline at mga local bands na Parokya Ni Edgar, Pupil, at Itchyworms. Nag-perform din si Ebe Dancel na dating vocalist ng Sugarfree. Nanawagan si Dingdong, MTV EXIT celebrity ambassador in the Philippines, na maging mulat at makialam ang mga Pilipino ukol sa human trafficking. Siya rin ang advocacy champion ng Department of Justice Inter-Agency Council Against Trafficking na suportado ng United States sa pamamagitan ng embahada nito sa Maynila. Sandaling dumalo si singer-songwriter Jason Mraz sa concert bilang isa sa mga international artists na isinusulong ang MTV EXIT campaign. — ELR, GMA News