Pagbukas sang bag-o nga airport ginkakibot

Nagakalangkag na ang mga pomoluyo sa Cabatuan, ma sang taga-Tiring, pinakamalapit na barangay sa bag-o nga airport sa Iloilo. Suno sang mga nagabaligya maayo ang kita sang ginsuguran ang construction. Karon nga natalana na ang operasyon sa masunod nga semana, nagalaum ang mga ini nga pati ang ila negosyo mabuhi. Magluwas sa mga negosyante, nagalaum man sang dako nga kita ang mga tricycle driver. Wala pa sang na-aprobahan nga prangkisa sa mga tricycle nga makabiyahe halin sa banwa pakadto sa bag-o nga airport nga maga-agi diri sa barangay Tiring. Pero nagakatabo na nga may ginadul-ong sila nga pasahero pakadto sa airport sa pag-umpisa gid sang construction. Sa karon nagalaum sila nga makabiyahe sagihapon sang talunsay kag mahimu-an paagi nga makaayo ang dalan dungan sa operasyon sang airport. Primera klase nga banwa Ginalauman sang municipal assessor nga isa sila sa masako nga talatapan sa lokal nga pamunu-an sang Cabatuan kon magsugod na ang operasyon sang airport. Magapatigayon sila gilayon sang field appraisal kag assessment sa palibot sang airpot. Sa subong pa lang ginapanan-aw na ang kauswagan nga dala sang operasyon sang airport sa Cabatuan, nga sa karon fourth class municipality pa lamang. Pero posibleng mangin first-class municipality niini tungod sang bag-ong airport. Target sang lokal nga pamunu-an subong nga tuig ang P1.5 million nga real property tax kag P1.2 million sa business tax. Magasaka kuno sang sobra 200 porsyento ang ila real property tax collection kag 100 porsyento sa business tax collection. M adamo naman kuno sang mga negosyante ang interisado nga pagpahamtang sang ila negosyo sa Cabatuan. Daku nga bulig sa kauswagan sang Cabatuan ang airport nga idugang sa ila internal revenue allotment nga nagdangat sa masobra P41 million. Air controllers malipayon Ginkakibot na sa mga air traffic controllers sang Manduriao airport ang pagsugod sa operasyon sang bag-o nga airport sa Cabatuan. Suno sa mga ini, kapin 37 ka tuig na nga kangay nangin puluy-an ining control tower Mandurriao. Abril pa tani nagakalangkag na ang senior air traffic controller nga si Leo Bernabe nga manghakot sang gamit padulong sa new airport. Sa bag-o kuno nila nga control tower cab, hit-ech na ang tanan gani ginahanda na ni Leo ang iya kaugalingon. Isa ka adlaw nga ginpaidalum sa training ang tanan nga air traffic controllers para sa bag-o nga airport. Ang mga telepono kag tanan nga komunikasyon nga ila paga-usaron sa pag-contact sa mga piloto ang maga-agi na kuno sa recorder sang air navigational service sang Air Transportation office. Ang traffic control cab sa Cabatuan amo ang pinaka-hi-tech sa tanan nga cab sa bug-os nga Pilipinas, suno kay Jimmy Golez, hepe sang air traffic control. Mokabat sang 99 ka pamilya ang ginpangsaylo diri sa relocation site sa Cabatuan sa pagsugod gid sang proyekto sa bag-o nga airport. Ginpangbakal ang ila yuta agod patindugan sg P8-billion airport project. Indi tanan ginkalipay ang operasyon sa airport. Kon sila lang kuno ang masunod, mas luyag nila nga magbalik sa naandan nga pagpangabuhi. Pero kumo wala na sang mahimo kay para sa kauswagan sang kadam-an ginala-uman nila nga sa pagbukas sang airport indi sila malipatan. - Ratsada