Ulihi, una nga flights sang old, new airports

Ang Flight 5G 461 sang Cebu Pacific ang pinakaulihi nga eroplano nga naghugpa kag naglupad sa antigo na nga Iloilo Airport sa Mandurriao, samtang ang Flight 2-p-9-8-7 sang Air Philippines ang pinakauna nga commercial aircraft nga naghugpa sa bag-o lang gin-inagurahan nga airport sa Cabatuan. Sigurado na mangin kabahin sa kasaysayan sang mga airport sa Iloilo ang ini nga mga flight. Sa pinakaulihi nag-abot nga masobra sa 70 ka mga pasahero gikan sa Metro Manila, kalabanan sa mga ini ang nalipay bangud mangin moderno na ang ila masunod nga hugpaan nga airport kag mangin kabahin na sang kasaysayan ang ila mga pangalan. Si Nida Montano, isa sa mga pasahero sa last flight, ginkakibot ang iya ulihi na nga pagtapak sa airport nga nasaw-an kag pirme gina-agihan. Kun may yara sang nagasentimyento sa Mandurriao airport, indi gid magpaulihi si Captain Nerio Ignacio, piloto sang pinakaulihi nga eroplano nga nagtapak sa runway sang old airport. Suno sa iya, nangin kabahin na ang Mandurriao airport sang iya masobra 10 mil ka oras nga flight sa sulod sang 11 anyos nga paglupad. Mangin makasaysayan liwat ang first commercial aircraft nga naghugpa sa bag-o nga airport sa Cabatuan. Ang Flight 2-p-9-8-7 sang Air Philippines ang pinakauna. Dako kuno nga dungog para sa tagdumalahan sang airlines nga mangin parte sa espesyal nga adlaw sang P8-billion kag world-class nga Iloilo Airport. Si Captain Gasilim sang Air Philippines ang nagbyahe sang 102 tanan ka pasahero halin sa Manila. Pagkatapos nga makapanaog ang mga pasahero kag nadiskarga ang ila ang mga bagahe, ginhanda lang sang mga crew kag staff ang eroplano para liwat naman nga magdala sang pasahero pabalik sa Manila. Sa obserbasyon ni Jane Go, branch manager sang Air Philippines diri sa Iloilo, nangin maayo ang plastada sang ila mga flight subong nga adlaw, Hunyo 14, 2007. Ini ang mga yuhum sang mga pasahero nga amo ang una nga naghugpa kag naka-usar sang moderno nga mga pasilidad diri sa bag-o nga airport. Magluwas nga kabahin na sila sa maragtason nga first day of operation, kaangay nagapiesta man ang ila mga tagipusuon tungod tuman na kalayo ang itsura sang airport nga ila ginsamputan subong sang sa airport nga ila ginhalinan sang pagbiya sa ciudad sang Iloilo. Ining automatic nga pagbukas sara sang pwertahan sa arrival area ang pila lamang sa pasilidad nga ginatumod ni Rudy Arraza nga moderno sa sining airport. Duha ka tuig na ang nakaligad sang naghalin sa Iloilo si Rudy kag nagpadulong sa Saudi Arabia kun sa diin ini nagatrabaho bilang technician. Ang mag-asawa nga Buenaflor ang isa man sa 102 ka mga passenger nga una nga nakatapak sa bag-o nga airport kag ila ginadayaw ang ginpasangkad nga airport. - Ratsada