Lider ng militante pinatay sa Tacloban

Kasunod ng ipinatawag na pulong ng Supreme Court para lutasin ang extrajudicial killings sa bansa, isa na namang lider militante ang pinatay sa Tacloban City madaling araw ng Martes. Binaril at napatay ng hindi kilalang salarin si Charlie Solayao, 51, charter president ng Anakpawis party-list group sa Tacloban. Sa pamamagitan ng text message, sinabi ni Carl Ala, tagapagsalita ng Kilusang Magbubukid ng Pilipinas (KMP), ang pagpatay kay Solayao ay lantarang pag-atake sa mga militanteng grupo. “The incident was really a brazen attack against members of the militant groups especially now that the SC summit is ongoing," aniya. Idinagdag pa niya na ang pinakabagong kaso ng pagpatay ay pagpapakita ng kawalan ng respeto ng “death squads" ng Armed Forces sa ipinatawag na summit ng SC. Kabilang sa mga dumalo sa pulong si Anakpawis Rep. Crispin Beltran na kalalaya lamang noong nakaraang linggo mula sa mahigit isang taon “pagkakapiit" dahil sa kasong rebelyon na isinampa ng gobyerno laban sa mga militanteng kongresista. - GMANews.TV