Neri: Nag-alok si Abalos ng '200' suhol

Ibinunyag ni Higher Education Secretary Romulo Neri na sinabihan siya ni Elections chairman Benjamin Abalos na makatatanggap siya ng “200" sa pag-apruba ng kontrata ng Zhong Xing Telecommunications Corp. ng China para sa $329.48-milyong national broadband network (NBN) project. "Sec, may 200 ka dito...’ medyo nabigla ako but since he was our host I kept quiet," pahayag ni Neri sa pagdinig ng Senado sa kontrobersyal na kontrata nitong Miyerkules, kaugnay sa sinabi ni Abalos. Ayon kay Neri, naganap ang kanilang pag-uusap sa Wack Wack Golf and Country Club sa Mandaluyong City nang makipaglaro ito ng golf kay Abalos noong nakaraang Enero o Pebrero. Si Neri ay director general ng National Economic Development Authority (NEDA) noon at nagsuri sa NBN project. Inilipat siya noong Agosto bilang chairman ng Commission on Higher Education (CHED). "I was too shocked to say anything," sinabi ni Neri. "I informed my NEDA staff that they should be careful in assessing this project...be careful with the costing," pahayag ng kalihim matapos diumano ang pagkikita nila ni Abalos. Nang tanungin kung may kaugnayan ang “200" na binanggit ni Abalos sa ZTE deal, tumugon si Neri: "I guess since we were discussing the ZTE project... sa golf you discuss things occasionally... matters you need to discuss, mga ganun." Samantala, umalma si Abalos na hindi niya naintindihan ang paratang ni Neri. "Hindi ko naiintindihan 'yung 200 na sinasabi...whether it's 200 million, 200 thousand, 200 pesos...How can I comment on something when itong nag-na-narrate could not say whether it was 200 million o 200 thousand." "I would be bribing people of the Philippines on behalf of the government of China? I think this is serious!" dagdag niya. Sa kabila nito, hindi nakikita ni Neri na naging dahilan ang kanyang pagdududa sa kontrata sa paglilipat sa kanya sa CHED. Ayon sa kalihim, sinabihan siya ni Executive Secretary Eduardo Ermita na kailangan siya ng Presidente sa CHED. "She needed me there... they said I had unique talents that could help address the problems," sinabi Neri, "Usapan po namin I would go back to NEDA, sabi niya (Ermita) one year, sabi ko six months." Sa pagsisimula ng paggisa kay Neri, tinanong siya ni Senate President Manuel Villar Jr.kung nakipag-usap siya kay Abalos tungkol sa proyekto. "Chairman Abalos came to visit me at NEDA...sometime maybe late last year or early this year, to pay me a visit," sagot ni Neri. Bukod sa nabanggit na pagpupulong sa NEDA at sa Wack Wack, kinausap pa si Neri ni Abalos sa isang tanghalian sa imbitasyon ng embahada ng China sa Makati Shangri-La Hotel. Dumalo diumano dito ang mga opisyal ng Chinese embassy at ng ZTE Corporation. "I cannot recall what we discussed... I have a very poor memory. I believe we had a lunch meeting arranged by the Chinese embassy, one or two officials of the Chinese embassy, and the ZTE, and Chairman Abalos was there," ayon kay Neri. "I left early... the ZTE officials were heavy smokers. Then we had a golf game. we had a very nice golf game. The chairman was very charming," dagdag ni Neri. Sa pagkakataong ito, binanggit ni Abalos ang diumano’y “200" at matapos nito ay ang “technical presentation" ng mga ZTE officials, ayon kay Neri. Maaari rin daw tanungin ang mga deputies ng NEDA kung saan ipinaalam ni Neri ang nangyaring pag-uusap nila ni Abalos. Nang tanungin ni Sen Panfilo Lacson kung nagulat ang kalihim sa sinabi ni Abalos, sumagot ito na: "I was shocked because I am not used to being offered... at medyo malaki." Sinabi din ni Neri kay Presidente Gloria Macapagal Arroyo ang diumano’y panunuhol at sinabihan siya nito na "Huwag mong tanggapin." - Mark J. Ubalde, GMANews.TV