Cebu schools andam na para sa Sinulog 2008

Gideklarang wa nay klase ang pipila ka mga tunghaan sa dakbayan sa Sugbo sugod Miyerkules sa pagpangadam sa Sinulog grand Mardi Gras. Apan gustong masiguro ni Dr. Lorna Ranses, Cebu City shools division superintendent, nga dili mauwahi ang mga tinun-an sa Sugbo sa ipahigayon unya nga National Achievement Test. Bisan og way klase ang pipila ka mga tunghaan tungod sa Sinulog, gimando ni Ranses nga ipadayon ang mga klase sa Lunes sa mga tunghaan ilabi na kadtong di mosalmot sa pangandam sa grand Mardi Gras. Unang nasayran nga way klase sugod sa Miyerkules hangtod sa Lunes sa sunod nga semana ang tulo ka mga tunghaan nga magsilbing temporaryong pinuy-anan sa Sinulog contingents gikan sa mga lagyong probinsya. Magdepende lang sa principal sa tunghaan ang desisyon kon kanus-a ipahigayon ang make-up classes sa maong mga tunghaan. Dili hinoon tanang tunghaan ang mosalmot sa Sinulog karong Domingo. Sinulog 2007 champion Gikaingong mas gipanindot pa ug gipalahi ang presentasyon nga gi-andam sa Tangub City contingent karong tuiga. Ang Tangub maoy defending champion sa Sinulog competition karong tuiga tungod sa pagdaog niini niadtong 2007. Nangabot na niining Martes ang props men ug choir members sa naasoyng contingent aron i-andam ang mas bongga nga presentasyon. Karong Miyerkules, mangabot ang 100 ka dancers gikan sa Tangub uban ang ilang choreographer. Moabot usab ang contingent gikan sa Sultan Kudarat ug Shariff Kabungsuan. Kwarenta ngadto sa 50 ka dance contingents ug kapin sa 30 ka floats ang gilaumang mosalmot sa Sinulog karong tuiga. Nipasalig ang mga pulis sa dakbayan nga hugot ang ilang ipatuman nga seguridad atol sa pagpahigayon sa pangilin. - Balitang Bisdak