Erap pwede pang tumakbo sa pagka-pangulo sa 2010 - Goco

Maaaring kumandidato sa 2010 presidential elections ang pinatalsik na dating Pangulo na si Joseph Estrada dahil hindi niya natapos ang kanyang anim na taong termino, ayon kay dating Solicitor General Raul Goco nitong Huwebes. Sinabi ni Goco na hindi siya nakatitiyak kung maaaring ipatupad kay Estrada ang nilalaman ng Saligang Batas na nagbabawal sa isang dating pangulo na nanungkulan ng anim na taon na muling kumandidato. Ang pananaw ay ginawa ng dating solicitor general sa regular na pagtitipon ng Manila Rotary Club sa Manila Polo Club sa Makati City kung saan pangunahing bisita si Estrada. Si Estrada ay pinatalsik sa Malacañang noong Enero 20, 2001 sa pamamagitan ng people power dahil sa mabigat na paratang ng katiwalian sa ilalim ng kanyang administrasyon. Sinabi ni Estrada na nilisan niya ang Malacañang upang maiwasan ang pagdanak ng dugo. Sinabi ni Goco kay Estrada sa pulong ng Rotary Club na maaari itong tumakbo sa 2010 dahil hindi nito natapos ang kanyang termino. “I submit that he can still run because that very important issue that he was not able to complete his term must be imposed," pahayag ni Goco. Nagkaroon din ng supresa sa pagtitipon nang iendorso ni Atty. Jesus “Jess" Santos, abogado ni First Fentleman Jose Miguel “Mike" Arroyo ang kandidatura ni Estrada bilang presidente. Sinabi ni Santos, isang Rotarian, na tagahanga siya ni Estrada. “Can’t you do something so that you will be our president again?" tanong ni Santos kay Estrada. Sinabi ni Estrada kay Santos na wala siyang plano ngayon kung muling tatakbo sa 2010 presidential elections. “It is not easy to answer you at this time. But my objective right now is to unite the opposition to ensure the opposition’s victory in 2010," ayon sa dating pangulo. Idinagdag niya na: "Whoever will have the highest rating in the surveys, he or she will be the presidential candidate I will support in 2010." - Fidel Jimenez, GMANews.TV